فى القرون الوسطى كان الشرق الأوسط من كثر القارات فى التقدم، العلم أو الإبتكار، اليوما مع الأسف من أكثر القارات فى العنف، التخلف، التخريب أو عدم التسامح، أو هاد الشي كايرجع بالأساس للإسلام السياسي، التعدد نعمة، أمـّـا أحادية الرؤية أو الذوق ما هوما غير قنبلة موقوتة.

أو ذوق الخوانجية اللي باغيين إفرضوه علينا: ها "الفن النظيف"، ها "الفن الوسخ"، أحسن دليل على خلط السياسة بالدين، لأن "النظافة، الطهارة" قيمة من قيم أو مرتكزات جميع الديانات، ولاكن الإسلام السياسي كايستعمل هاد القيم قصد تبرير العنف اللفظي أو الجسدي إيلا قتضي الحال ضد كل مبدع، صحفي، مثقف ولا ّ أكاديمي، حسب الإسلام السياسي ضروري ستئصال كل حاجة ما كاتــّماشاش مع الطهرانية، لا من كفار، ملحدين ولا ّ حتى من خالفهم الرأي، أو كل واحد ما كانش متحمّس بحالهم للاسلام السياسي، لا من مسلمين متسامحين، مسيحيين جاز فى حقو القتل، التهجير أو الترحيل.

ولاكن الإسلام الساسي ما جاش من فراغ، مثلا، فى مصرة فاين ضارب الفقر المدقع القيطون، 40 فى الميا من الشعب كاتعيش ب 2 دولار فى النهار، جيوش من الشباب كايعانيوْا من الأفق المسدود، من غد بـْـلا مستقبل، زيد عليها الرشوة، المحسوبية أو دولة ضعيفة ما عندها حتى شي تصور واضح المعالم، بحال الحكومة المغربية الحالية، المشاكل الإجتماعية أو قلــّة الشغل بالأخص هي اللي كاتدفع الشباب المغربي ولا ّ المصري فى أحضان الإسلام السياسي، الإرهاب أو الجماعات الدينية المطرفة بحال داعش أو اللي ملــقـــّـمين عليها.

الإسلام السياسي نظام توتاليتاري، نظام غير ديمقراطي، كايحارب الحريات الفردية أو جميع أنواع العدد، أو فى كل بلاد طلق فيها رجليه أو ترعرع إلا ّ أو قام باضطهاد الناس، مصادرة حقوقهم فى اللباس، الأكل أو كيفية تفكيرهم، الإسلام السياسي دامي، مولوع بالفتوات أو التحريض على القتل، الكراهية أو الإبادة الجماعية، أنصار الإسلام السياسي بحالهم بحال النازيين، الفاشيين الألمان اللي كانوا كايقـدّسوا الموت قبل من الحياة.

الإسلام السياسي عزيز عليه إشمّ لحم بنو آدام محـروق، بلا رحمة لا شفقة، ما عمـّـرنا أنــّـساوْا تصاور الإسلام السياسي أو هو كايـفـرنس، كايضحك الضحكة السفرة، السفيهة الماكرة، غير كايفتخر بجرائمو أو كايسخر من الضحايا اللي طعـن فى كل جبن من اللــّـور، فى هاد الحالة كايضربها الدين بصقلة أو كايفتح الباب أو الشهية ألـْـتوحّش الإنسان، أثر التخريب، الدمار الشامل أو الدم اللي جارّ من موراه الإسلام السياسي ما خلا ّ حتى شي قارة، بالأخص الدول اللي أتــّـاخدات الإسلام كادين للدولة، فى عوض ما يحمينا الدين الإسلامي، يحمي أولادنا، أحبابنا، أصدقاءنا أو ممتلكاتنا، كالس كايضربنا الإسلام السياسي فى أوسط ديورنا، الدارالبيضا، مراكش، الإسلام السياسي قنبلة أبدية، موقوتة، ضروي محاربة ممثليه، رموزو بكل قوة، جرءة أو صرامة من طرف الدولة، أو المجتمع ككل خصـّـو ينفي، يحجب أو إغـرّب جميع التيارات الإسلامية، كانت "لايْت" ولا ّ إرهابية، لأن الإسلام السياسي "لايْـت" هو اللي كايخلق "الإسلامي الإرهابي" النمودجي ديال غـدّا، ضروري فصل الدين على السياسة، يعني على شؤون الناس، عندنا المؤسسة الملكية اللي كاتضمن لينا الأمن الروحي، أو ما خصــّـنا حتى شي حزب بجنب العاهل المغربي اللي غادي إورّي لينا فاين جات القبلة ولا ّ شحال من مرة خصـّـنا نصلـّـيوْا، ديما هازّ صبعـو بحال شي ربّ بيت فضولي، متكـبـّـر أو قاسي، مطلـّـع حجبانو للسما: "لا تنسى ذكر الله"، "سمعتيني ولا ّ لا؟"